Mujhe Sochne De - Sahir Options

[noorie]

Mujhe Sochne De
-Sahir

Meri naakaam muhabbat ki kahaani mat chhed
Apni mayoos umangon ka fasana na suna

Zindagi talkh sahi, zahar sahi, sitam hi sahi
Dard-o-aazaar sahi, jabr sahi, gham hi sahi
Lekin is dard-o-gham-o-jabr ki vus’at ko to dekh
Zulm ki chhaanv mein dam todti khalqat ko to dekh

Apni mayoos umangon ka fasaana na suna
Meri naakaam muhabbat ki kahaani mat chhed

Jalsa-gaahon mein yeh vahshat-zadah sahme anboh
Rahguzaaron pe falaakat zadah logon ke giroh
Bhook aur pyaas se paz-murdah siyaah-faam zamin
Teerah-o-taar makaan, muflis-o-beemaar makeen
Nau’e-insaan mein yeh sarmaayaa-o-mehnat ka tazaad
Aman-o-tahzeeb ke parcham tale qaumon ka fasaad
Har taraf aatish-o-aahan ka yeh sailaab-e-azeem
Nit naye tarz pe hoti hui duniya taqseem
Lahlahaate hue kheton pe jawaani ka samaan
Aur dahqaan ke chhappad mein na batti na dhuan
Yeh falak-bos milein, dilkash-o-seemeen baazaar
Yeh ghalaazat ye jhapat_te hue bhooke bazaar
Door saahil pe woh shaffaaf makaanon ki qataar
Sarsaraate hue pardon mein simat_te gulzaar
Dar-o-deevaar pe anwaar ka sailaab ravaan
Jaise ik shaayar-e-madhosh ke khwaabon ka jahaan

Yeh sabhi kyon hai ye kya hai, mujhe kuchh sochne de
Kaun insaan ka khudaa hai, mujhe kuchh sochne de
Apni maayoos umangon ka fasana na suna

Meri naakaam muhabbat ki kahaani mat chhed !

[humble_rafi]

Typical Andaz-e-Sahir.It has beautiful expressed the dark side of our lives.

Thanks a ton.